Auso, i wett mi hie mau churz ä chli vorsteue. I heisse Sandra Buol und bi am 22. Mai siebzähni worde. I ga id Sekunda vom Gymnasium Burgdorf, was mi meischtens ä chli aschisst, aber mängisch glich no luschtig isch.  
Am liebschte würdi natürlich eifach nüt mache, aber da i ja ganz äs Vernünftigs bi, weis ig ja, dass das nid geit :-).  
I tue unger angerem gärn schribe, läse, tanze und Musig lose. Musig isch augemein sehr wichtig für mi, aber da ig ersch vor öppe emene Jahr mi richtig Musiggschmack für mi entdeckt ha (Der Rock regiert die Welt), lose ig im Moment no viu Mainstream. Das wird sich aber im Verlouf vor Zyt aber sicher no ändere. 
 
Hie ä chlini Uflistig vo däm, wo i gärn lose: Die Ärzte, Die Toten Hosen, WIZO, Nightwish, Metallica, Mando Diao, Placebo und Oomph!. 
I bi eigentlich offe für aues, aber mini Schmärzgränze ligt so bi völlig melodielosem Metal, Hitparade Hip-Hop, Ländler und so setigs Züg. 
 
Leider lidet mis Portemonnaie doch sehr unger mire CD und Plattesucht (ja genau, Platte, dass si die grosse schwarze Redli us Vinyl :-)). Dorum bini ständig uf dr Suechi nach Jobs.  
 
Ä witeri Lideschaft vo mir si Fiume. Dorum bini äs wili lang ä ziemliche Fernsehjunkie gsi, aber i gloube, dass het sich wieder ächli besseret. I luege eigentlich jede Fium, aber mini Lieblinge si Herr der Ringe, Dirty Dancing, Fight Club, Crazy, und no vili meh. Dir gseht, mis Repertoire geit vo Fantasy, über Schnulze bis hin zu Teeniekomödie. Zu brutal chas mir eigentlich nid wärde, i bi da ziemlich unempfindlich. 
 
Hmm, chöme mir itz ä chli zu mir persönlich. Mini Fründe säge, i sig sehr introvertiert, und i vertroue hie mau uf ihres Urteil. Aber weni de d Lüt aube ä chli besser kenne, de chani de ou angers. Mi chli Fründeskreis isch sehr wichtig für mi, aber ich cha ou mau äs wili ohni si. Telefoniere isch nid so mis Ding (bis am lehre *g*), aber i tue drfür gärn chatte.  
I hane riesige Vorliebi für aus Dunkle. Das zeigt sich zum Teil ou i mine Gschichte. I bi fasziniert a de dunkle Site vo de Mönsche, a de töife Abgründ wo i jedem vo üs dine si.  
Was ig auerdings hasse, isch ängstirnigs Dänke wo meischtens nid über d Nasespitze us geit. Das beinhautet ou Nazis, Rassisten, Minderheitehasser, etc... 
 
So, i gloube, dass isch ds wichtigschte über mi. Wär no öppis wott wüsse, söu nume lieb frage :-).